الحلوة و القمر

D مْبارِح بِعَتِمْ الليل عاتَبْني القَمَر قَلْقان لِحْفافْ الصُبُح اْسْتَنَّى و انْتَظَر زْرَعْت السَهِم بِالْقَلِب تَيِزْهِر ثَمَر ؟ تْصُءْ مْنَوْب يا بَدِر ... ما عِندا خَبَر !!! يا قَمَر يا خِتْيار ... شو الجابَك عَباب الدار شو الشَوْشَحَك عا مْطَل شِرْفِتْنا ... شو بْفِكْرَك إنَّك بْتِبْسِطْنا ؟!!! لِك لا اخْبارَك مِتِل اخْبارِنا ... و لا اسْرارَك مِتِل اسْرارْنا ... و لا شَيِبْتَك مِتِل خْيوط شَيْبِتْنا روح إسْكَع عَدْروب غُرْبِتْها إضْوي على شِبّاكْها ... إتْكي عا مْخَدِّتْها سَرِّح ظَفايِرْ شَعِرْها ... إمْسح عجَبْهِتْها و اْحْديلْها تَتْنام ... و تِحْلَم الأَحْلام ... و بِوِج الصُبُح ... لما تْفيق ... جَهِّزْلها الحَمَّام و سَلْحِب على السْكَيْت ... تْعَمْشَق على الطاقَة ... تْنَأْوَز ... عالكِتِف ... عالرِدْفَيْن ... عالأبْيَض الشَمّام ... بِتْشَبْشِب يا قَمَر ... و حْياتَك يا قَمَر و عالبَحِر ... يا قَمَر ... لا تْخَلّي دَرْبها تْروح بْتِنْوجِع دِغْري ... و بْتِتْعَب جُوّاتْها الروح و بْتِبْكي ... دَخْلَك يا قَمَر لا تْبَكِّيها ... و لا تْخَلّلي البَحِر يْغَرْغِر مَآقيها أُوعا يا قَمَر عَيْنِها تِدْمَع ... و اللولو عا خَدِّها يِبْرُق و يِلْمَع بْتِهْتَز الدِني ... و بيهوج البَحِر ... و قَصْف الرَعِد بِسْمَع و طَيْر البَحَر ... بْعَصْف الهواء ... ما في حَدا يِجْمَع دَخْلَك يا قَمَر لا تْقَوّي عَلَيْها الريح و فِسْتانْها يْطير ... و أْوام عن خَصِرْها ... مِتِل الشِّراع ... يْزيح مِش وَقْتِها يا قَمَر ... إرْحَمْني يا قَمَر يا قَمَر يا خِتْيار ... يا كَاتِم الأسْرار ... تْمَّنى مَعي من جْدِيد تِرْجَع بِنِت ... و إرْجَع صَبي ... يُضْرُبْلِها مْواعيد و يِغْزِلِّها أشْعار ... و عْقود من أزْهار و يِغْمِزْلِها ... و يِهْمِسْلِها ... و يِطَيِّرْلِها تْناهيد ... بْكِل صُبْح و مَسا ... و صيف و شتي ... و عا كِل مَكان بْعيد ... و يْكَرِرْلِها وِ يْعيد ... وَحْدَك إنِت الّلي بْريد ... وَحْدَك إنِت الّلي بْريد ***