أحلام زلزلة: صُور.. سِجَّادِةْ صَلَاةْ عَمْ تِمْشِي عَ الْمَيّْ

شْعُور غَرِيب... حَاسِسْ إِنِّي مَلِك! وِالْمَطَر عَمْ يِنْزِل نِقْطِه مَيّْ وْنِقْطِه سِحْرْ، تَا صَار الشَّجَر يِشْرَب مْنِ الْبَحِرْ... وِمَا يِمْلَحْ! لَمَّا صُورْ قَامِتْ مْنِ النَّوْمْ... وِجُفُونْها فَتَحِتْ، هَيْدِي صُور... سِجَّادِةْ صَلَاةْ عَمْ تِمْشِي عَ الْمَيّْ كِلّْ مَا دَاسِتْ عَ مَوْجِه، بْتِفْقَعْ زَهْرِةْ جُلَّنَارْ، بْتِدْهِنِ الْوَجَعْ، وْبْتِعْمِلْ مِنُّو كْحِلْ... تَا تْكَحِّلْ عْيُونِ الْمَدِينِه. هَيْدِي صُور.. مَرَقْ الْمَسِيحْ بارَكْهَا... غَسَلْ مَوْجها، وِمِنْ وَقْتْهَا الْبَحْرْ مِحْرَابْ مْعَشِّشْ فِيهِ الأَمَانْ، بِيَعْرِفْ إِنُّو هَالْمَدِينِه مَحْمِيِّه... بِالضَّوّْ،وِبِالْمِلِحْ،وِبِالْكِتَابْ! تْطَلَّعْ قْدَامَكْ... عقْدِ الْقَلْعِه عَا كْتَافِ الأَيَّامْ، وَالْعَوَامِيدْ عَمْ تِحْكِي بِلِكْنِه جَنُوبِيِّه هَادْيِه، عَنْ بَحَّارْ قَدِيمْ، وَمَرْكَبْ بِيِتْشَقْلَبْ... كَأَنُّو تَحْتو السَّمَا . وِالشَّمْسْ لَمَّا تِنْزِلْ تِشْلَحْ فُسْتَانْهَا الأَحْمَرْ عَ الشَّطّْ، يِسِيلْ مِنْهَا اللَّوْنْ وِيْعُومْ... تَا الشَّفَقْ يِفْكِرْ حَالُو فُسْتَانْ! عَ الْمِينَا... كِرْسِي خَشَبْ قَاعِدْ عَلِيهْ صَيَّادْ، عَنْدُو نَايْ ضَايِعْ بِالرَّمِلْ، بْيِنْفُخْ فِيهِ لَحِنْ عَتِيقْ... بِيِعْمِلْ رَغْوِةْ زَبَدْ. مِنْ قَبْلِ مَا يِخْلَقِ الْعُمُرْ! أَنْتَ بْجَدّْ مَلِكْ... بْتِقْطِفْ الْقَمَرْ مْنِ السِّمَا، تِنْتِفْ شْوَيّْ مِنْ نُورُو، وْتِكِبُّو بِاللَّيْلِ عَ الْمَيّْ... بْيِنِطّْ الضَّوّْ قْدَامَكْ مِتْلِ السَّمَكْ، تِعْمِلْ مِنُّو لِلْمَدِينِه مَرَاكِبْ،وْعُقُودْ، وْحَلَقْ . صُورْ... زَمَنْ وَاقِفْ عَ رَاسِ الصَّخْرَه، بْيِجْدِلْ خْيُوطِ النُّورْ، وِكِلّْ جِدْلِه تِنْزِلْ عَ الْمَيّْ... تِعْمِلْ جِسِرْ لِلْمَرَاكِبْ. عَا حَفِّةِ الْمِينَا... كِلّْ مَا تِرْسُمْ اسْمَكْ عَ الرَّمِلْ، وِيِجِي الْمَوْجْ يِمْحِيهْ، بْيِوْسَعِ الشَّطّْ، وْبِيِضْحَكْلَكْ... وْبِيِرْجَعْ يِرْسْمَكْ! بْتِلْمَحِ الْبَحِرْ، كِلّْ مَا يِسْمَعِ اسْمِ الله... يِهْدَا شْوَيّْ، وِيِرْجَعْ يِضْحَكْ مِتْلِ وَلَدْ سَمَحُولُو بَعْدِ الْعِقَابْ يِرْجَعْ يِلْعَبْ! كِلّْ مَا ضِحِكِ الْبَحِرْ... تِكْبَرْ صُورْ، وْشُو عَادِي تِكْبَرْ مَعْهَا... وْتِحِسّْ حَالَكْ مَلِكْ! الكاتبة والشاعرة أحلام محسن زلزلة البلد: لبنان - (الخيام)